TUMULAK CLAN ASSOCIATION INC. OFFICIAL WEBSITE

NALUNOD ang SuperFerry 9 sa lawod sa lungsod sa Siocon, Zamboanga del Norte kagahapon sa buntag - lima na ang kompirmadong patay, 63 ang missing ug 900 ang naluwas.

Sa news conference kagahapon, si Coast Guard chief Admiral Wilfredo Tamayo niingon nga ang barko nibiya sa puwerto sa General Santos City sa alas 8:45 sa buntag niadtong Sabado paingon sa siyudad sa Iloilo sa Visayas dihang nakasinati kini og problema sa iyang generator.

Si Tamayo niingon nga base sa talaan sa Aboitiz Transport System Corp. (ATSC), dunay 870 ka mga pasahero ang SuperFerry 9.

Apan, ang Philippine Coast Guard nitaho nga lima ka mga tawo ang namatay ug 63 ang missing dihang nitakilid human nadaut ang ‘generator’ ug nalunod kini sa Siocon Bay sa Zamboanga Peninsula.

Kagahapon sa alas 3:00 sa hapon, ang Coast Guard niingon nga duha ka mga patay ang naugkat sa fishing vessel (FB) Charito nga niapil sa search operation.

Dason sa Coast Guard, 900 ka mga tawo, lakip sa kapitan sa barko, Jose Yap, ang naluwas.

Sa sayo pa, ang Coast Guard nitaho nga tulo ka mga patay ang naugkat sa mv Myriad nga sister ship sa SuperFerry 9 ug Philippine Navy vessel 171.

Dugang sa taho nga 268 ka survivors ang gipasakay sa MV Ocean Integrity; 439 sa MV Myriad; 170 sa mga barko sa Philippine Navy; ug 23 sa boat Sierra.

“So ang casualties sa atin, lima. Pinaghahanap natin 63 pa, kasama crew and passenger,” matod ni Coast Guard spokesman Cmdr. Armand Balilo na nahinabi sa dzRH.

Sa pasiunang imbestigasyon, si Tamayo niingon nga ang SuperFerry 9 nagsugod sa iyang problema dihang ang generator namatay sud sa makadaghang higayon.

Apan ang awtoridad mohimo og dugang pakisusi sa hiabo human sa search and rescue operations.

Nasayran nga ang nahitabo sa SuperFerry 9, sa Aboitiz Transport System di surprisa tungod sa mga miaging hitabo.

Niadtong Mayo, ang SuperFerry 9 natanggong sa kadagatan sa Camiguin sud sa 12 ka oras tungod sa problema sa makina.

Niadtong Pebrero 2007, ang samang barko namatay sa kadagatan sa southwest sa Daog Point on Negros Island samtang naglawig kini padulong sa siyudad sa Bacolod gikan sa siyudad sa Iligan sa Mindanao.

Ang samang maong barko natanggong duol sa Masbate tungod sa buak sa engine cylinder head. Human kini naayo pinaagi sa pag-ilis sa cylinder, nakasinati na usab kini sa usa ka leak samang adlaw sa ilang paglawig sa kadagatan sa Romblon.

Ang sunodsunod nga hitabo sa samang barko, ang Maritime Industry Authority naaghat sa pag-revoke sa SuperFerry 9’s safety certificate niadtong 2007 ug nimando sa kompaniya nga di pabiyahion ang maong barko.

Sa pagkakaron, ang mga barko sa Navy ug tulo ka mga abyon sa militar ang nagpadayon sa ilang search and resucue operation, sumala ni Defense Secretary Gilberto Teodoro, kinsa nangulo sa National Disaster Coordinating Council (NDCC).

Lakip sa nitabang sa operasyon mao ang tropa sa Amerikano nga tua sa dakbayan sa Zamboanga pinaagi sa paggamit sa ilang kahimanan.

Atol ning pagsuwat, wala gibutyag ang listahan sa mga ngan sa nakalas nga pasahero. (Wires)